今年六月將有大事發生，全球注目，你梗係以為青冰說A股加進MSCI了，今次唔係，今次講嘅係4年一度的世界盃。無論你是否球迷，世界盃都總會有一種魔力，令到你會睇下波，認識一下陌生的國家名及靚仔球星，早幾日睇通告更加大開眼界，原來BB都可能會參與這個盛事喎。

雅士利（1230）上星期五公佈，佢地向蒙牛（2319）的附屬公司購入1628張俄羅斯世界盃的門票，合共約4百萬港元，由於蒙牛係雅士利的控股公司，所以有關交易係屬於關連交易，即使銀碼咁細，都需要作出公告，按通告話，這些波飛將支持集團的營銷活動。雅士利主要產品係嬰幼兒奶粉，咁客戶應該係BB啦，負責揀奶粉應該係媽咪呱，屆時各位爸爸會唔會為咗飛去俄羅斯睇，力勸老婆買呢個品牌的奶粉呢？最後啲飛去咗邊，自己諗。佢哋自13年被蒙牛收購後，業績愈來愈差，16年度蝕3.2億人仔，17年上半年都蝕1.2億，作為股東，見到公司愈來愈差，仲要見到你拎幾百萬去睇波，心情自然更差。

講開世界盃，即使你唔會睇波，都要理解下到時六月個股市會淡靜啲，作為亞洲球迷要挨眼訓睇，歐洲球迷雖然沒有時差，但由於大會想遷就下亞洲，有些賽事都安排在歐洲中午時間進行，即係話開緊市有波睇，歐洲交易員好可能trade少啲啊。至於概念股，青冰即時諗到啤酒，在港上市的華潤啤酒（291）及青島（0168）都算係受惠股，而蒙牛作為世界盃的贊助商，亦可借此機會向世界推廣自家品牌，不過點樣向飲住啤酒或伏特加（俄羅斯嘛）的球迷去sell自己呢，真係考功夫。體育用品股好似相關，但在香港上市那幾間，主打都係籃球及跑步，對足球用品的佈局仍然不足，如果夾硬要㨂，青冰都係首選龍頭安踏（2020）吧。