早前提過有雷神在陣的潘頓特別醒神，這效應剛戰進一步浮現。

潘頓剛周日（16日）贏夠五場。當中，「寶正寶」起步後力騎搶放爆出10倍半冷Win，而「暴風俠」入直路前留至包尾，還要不慌不忙在馬林中搵位突圍，不是潘頓騎的話，兩駒能否取勝成疑！

潘頓剛周日憑「標準猴王」食尾糊，搭雷神「請跟我來」的連贏位熱到得25蚊，下注前戰友問會不會太熱，但論近績上述兩駒均佳，更重要是兩位鞍上人都能給予捧場客信心。

試想「標準猴王」及「請跟我來」換了其他人騎，連贏可能分多三、四十蚊，但騎師可能令你無信心，就算派60蚊都覺得太熱，最終可能輸埋。

事實「標準猴王」上次唔係郭能起步瞌眼瞓，根本已經連捷。有人嫌有潘頓、雷神響度跑馬無賠率，但無佢哋，其他騎師你又有冇信心大注？

周三（19日）泥地賽夜潘頓停賽，市場焦點會放在雷神身上，這位前冠軍騎師於第八場三班1200米，騎上季曾夾檔連番上名的「精算閃擊」。

此駒今季由其他騎師接手跑了四次，不是被頂在外疊難跑，便是在拉士打衝鋒時遇上阻滯得過近字。今次寄望雷神可以較其他騎師跑高一至兩個馬位。

第六場三班1800米，「架勢」賦性慢熱，上季跑到季中才撻着，上次跑不合腳法田草1800米，大敗可以不理，實際狀態已跑起，周三晚回配最佳拍檔雷神跑泥地1800米，已屆勝時。