五月天陽光燦爛，2,000人噚日再次上街爭取平反六四。年初因病過身嘅支聯會主席司徒華，相信會喺天堂同大家一齊嗌口號，為大家打氣。華叔走咗快五個月，白鴿黨一班兄弟，將會喺六四左近出版新書《功成必有你在》，由何俊仁、張文光、李永達、李華明、鄭家富等兄弟，一人寫一篇文章憶華叔。

情人病逝後終身不娶

華叔一生用情專一，自從同樣任職教師的情人黃少容病逝後，華叔決定終身不娶，但原來華叔都做過一次「新郎哥」。白鴿黨前「大內總管」夏詠援喺本書爆料，話90年代華叔舉行過一場「婚禮」，着好晒新郎馬褂去迎親。其實當時係90年港同盟籌款之夜，為咗籌錢，華叔粉墨登場同王小鳳上演趣劇「華府迎親」。
援姐話最初接到個劇本，即時反應係「咁夠薑，連司徒華都敢玩」！援姐講笑話如果華叔唔肯接呢套戲，都好難搵到人執二攤，皆因當時港同盟內較有名氣嘅「剩男」只得佢同楊森。好彩華叔又冇乜所謂，爽快答應做主角。華叔排戲時好cool吓，只綵排一次，留下一句「到演出前你再話我知有乜要留意」就揚長而去，好彩最後都演出成功。

律己以嚴被視為黨鞭

華叔係民主黨黨鞭，援姐話佢老人家有個習慣，好鍾意話邊個黨員犯錯，就會搵本簿「習」低佢，呢個有可能係校長嘅職業病啦。華叔嘅多年戰友張文光都喺書中撰文，話喺民主黨呢，其實冇黨鞭呢個職位，只不過華叔律己以嚴，守時、慎言，所以大家視佢為黨鞭。張文話華叔曾建議佢哋時刻帶住本記事冊，記低意見，提出問題，諗出解決方法。

mailto:[email protected]