黎明（Leon）同老婆樂基兒之前曾經傳婚變，又俾人話自製恩愛騷，不過私下未有影響佢哋嘅感情，依然恩愛如昔。由國家廣電總局電影衞星頻道節目製作中心，以及美國美華藝術協會共同主辦嘅《第二屆紐約中國電影節》喺美國時間前晚，即係香港時間噚日清晨，喺美國紐約林肯中心舉行，而獲頒發「亞洲最傑出藝人獎」嘅Leon同樂基兒孖住出席。

亞洲傑出藝人

今次係佢兩公婆首次一齊出席公開活動，Leon同Gaile同樣以全黑襯到絕嘅打扮現身，兩個十指緊扣踏入紅地毯，現場即時起哄。
Leon專程飛去紐約攞獎，佢話：「得獎真係覺得好榮幸，希望亞洲同華人嘅電影可以越做越好，得到更多國家嘅肯定。」
至於首次同Leon一齊出席公開活動嘅Gaile就話：「我本身一早到咗加州，由於出發去北京做嘢前啱啱有一日時間可以飛紐約，所以咪親身到現場支持Leon攞獎。」時間咁緊迫Gaile都飛去支持老公，真係夠恩愛。
Leon此行另一重大任務，就係帶咗佢有份主演嘅新戲《鴻門宴》片段作全球首播。