扎鐵工人工潮持續，噚日有「生力軍」加入激勵士氣，毓民同保衞皇后嘅本土行動成員都有到場聲援，幾百人喺靠背壟道大鑼大鼓唱歌，有啲世藝冇咁悶，除咗同「鐵漢」同一陣線嘅人嚟打氣，八方噚日仲發現集會有其他另有目的嘅人四圍蒲。
有工人同八方講，其實過去幾日都有啲唔係工人嘅男男女女喺度出沒，佢哋唔係記者，又唔似嚟睇熱鬧，但總係企喺人多聚集地方，後來見佢哋返上警車休息，先知道原來係「無間道」！有便衣探員混入工人之中收風。

八方根據工人描述，果然發現現場有唔少無間道，其實都幾易「識穿」佢哋，唔使好似儍強咁多理論，只要見到唔係記者，又冇同工人一齊嗌口號嘅，就多數係無間道，普通市民嚟睇熱鬧唔得咩？罷工持續咁多日，街坊都睇到悶啦，現場湊熱鬧者有限。
咁無間道做乜呢？主要工作當然係收風啦，街工梁耀忠懷疑自己俾人「監聽」，佢話上禮拜已經察覺有「外人」混入工人集會同遊行隊伍，有日集會結束，幾個工人搵佢傾偈，呢啲無間道死跟，佢一於懶理，「又唔係作奸犯科，驚咩呀！」
除咗收風，無間道仲會學記者咁影相，有行家話呢幾日都有便衣喺現場影相，似乎係想將工人「點相」；亦有便衣借啲意行埋記者度「收料」，結果俾記者窒番轉頭，面懵懵閃開。現場消息話，呢批無間道應該係西九CID，大約十幾人。有個守西九嘅師姐同八方講，便衣探員喺集會現場「做嘢」好平常，方便警方維持秩序。
職工盟李卓人對便衣警員在場「收風」好驚奇，如果好似記者咁攞料更加離譜，「我哋做事好公開，任何人都可以嚟問我，警方唔需要咁做。」

阿人又話警員扮鬼扮馬有前科，今年7.1遊行就有便衣警員混入遊行隊伍，沿途催促市民行快啲，做法令人憤怒。立法會議員涂謹申話如果真係有警員冒充記者，警方應即時停止，因為會損害公眾對傳媒信心，削弱公眾知情權。人在做，天在看，八方奉勸警方咪搞咁多小動作，否則激起民憤仲難收科。