作為宅男心目中嘅「雙黃」BB——23歲嘅黃美棋同80歲嘅黃夏蕙口，噚日分別搶先試食麥當勞新推出嘅黑白漢堡，一個喺旺角，一個喺銅鑼灣，首先分別蒙眼試食黑白漢堡同傳統漢堡，睇吓食唔食得出隻打邊隻，最後精靈BB——美棋BB全部估中晒，食完仲得戚擺出舔舔脷甫士話：「我間唔中都食快餐，一試就中晒。」

問美棋BB到底有乜嘢法門？佢話：「因為我知黑漢堡嘅包皮係用墨魚汁整，所以有啲海鮮味。」原來靠包皮陣味。之後美棋BB仲邀請旺角途人試食估包，有男粉絲更被美棋BB迷暈到估錯晒。可惜，當呢位男士被蒙眼後，一心以為係美棋BB餵餵，但其實，係同行嘅文文BB負責餵餵就真。

至於另一個BB……黃夏蕙BB，噚日就梳孖辮出戰銅鑼灣。可惜蒙眼試食環節上，夏蕙BB將黑白漢堡調轉，只估中傳統漢堡，但佢話自己like黑包多啲，又大讚：「包皮好軟，真係好好味。」

夏蕙BB同美棋BB一樣，都有喺街上邀途人蒙眼試食估吓邊隻黑包邊隻白包，其間有騎呢中佬搭訕，夏蕙BB分甘同味，遞上手上另一個黑漢堡，兩人還合巹交包添呀!好感動呀!