見過突尼西亞對西班牙現真身之後，雖然佢哋喺呢場波唔識得保持曾領先1球嘅優勢，最後仲反輸3粒，但對佢哋嘅反擊戰術幾有好感。今日呢隻「迦太基之鷹」對住戰力差冇幾嘅東歐球隊烏克蘭，受讓有着數。
事實上，西班牙對突尼西亞場波，華度親眼睇住西班牙壓住突尼西亞攻足全場，但突軍都可以憑1次反擊造成入球，仲成為先開紀錄一方。呢球之前，其實突軍已經有過一次有睇頭嘅反擊，當係為西班牙防線敲響警號，轉頭就入波嘞。

反擊煞食唔怕烏克蘭

突尼西亞反擊戰術煞食，好多時就在於右後衞查比斯，氣力無窮咁上上落落助攻助守，令到當時引球反擊隊友，都唔使點望，好順利就將個波撇向邊路，拉開對手防線，效果非常唔錯。至於點解後來輸番3球，西班牙換入魯爾及法比加斯後，進攻瓣數多咗，整體實力又真係好啲，都好難怪。
不過，今日對住突尼西亞嘅烏克蘭，整體質素就未必及得上西班牙，突軍如果又做到入波，就絕對有機會搶到分。但因為烏克蘭呢場打和都願，夠分出線，相信突尼西亞最多都應該只可以博入1粒，波膽各一言和合理。足智彩有開「讓球」就仲易玩，揸住突尼西亞受讓半/一下盤，絕對有半個博十足優勢。文：華度
採訪隊推介
華度心水：突尼西亞下盤