酒會上碰到酒店L，梗係恭喜佢生意興隆，事關今年頭九個月嘅到港旅客人數已經超過去年全年，酒店生意冇理由唔好過去年。酒店L話：「好啲啦，其實遊客人數雖然好多，但好多自由行遊客係香港一日遊，晚上就返深圳，精過鬼，所以酒店生意冇預期咁好。」酒店L最希望啲歐美日豪客重臨，益多啲五星酒店，所以對郵輪碼頭十分渴望，希望有財團早日投資，政府早日定案。酒店L認為，貨櫃碼頭已經夠晒用，用唔晒㖭，起十號貨櫃碼頭簡直係浪費資源，而現代郵輪碼頭一個都冇，但董先生似乎熱衷於十號碼頭多過關心郵輪碼頭，奇怪也。

酒店一個大收入係餐飲。本地人結婚，好鍾意大排筵席，以前多去大酒樓，現在就鍾意酒店夠場面。酒店L話旺角至靚嘅酒店「朗豪酒店」為咗爭市場，推出「結婚套餐」，每圍酒菜五千幾，內包唔同形式優惠。呢個價格，十年前都唔得，何況「朗豪酒店」係豪華大酒店？此價一出，旺角啲酒樓梗係暈得陣，結婚人士唔去朗豪坊先至奇。
自由行遊客唔多使錢落酒店餐飲，個別遊客主要係幫襯快餐店，酒店L認為從中大市場系調查自由行遊客心目中嘅十大名牌中，可知一二。內地客心中之十大名牌，頭三名係金銀首飾珠寶店，分別係周生生、周大福、謝瑞麟。然後就係平價時裝店，鱷魚恤、佐丹奴、金利來、堡獅龍、G2000。另外兩間，第七名嘅係白花油，第九名係美心——即係可以推算到，內地客來港，首先買首飾，跟住買衣服，食飯就去美心快餐，臨走買幾樽正牌白花油，其他產品，視乎喜好而定。故此酒店L話：「想自由行帶旺全香港？冇咁易。經濟復甦靠自由行，幻想而已。」