【韓流】臨結局劇情緊湊 《陽光先生》收視再創新高
李秉憲金泰璃陽光先生
由韓國神劇《太陽的後裔》金牌編劇金恩淑執筆、李秉憲及金泰璃主演嘅tvN劇集《陽光先生》(Mr. Sunshine),噚晚播出最新嘅第20集,收視急升至16.5%收視率,再創下劇集收視新高,至於港劇迷可於周六、日晚10時30分透過Netflix追劇。
《陽光先生》仲有4集就大結局,所以劇情發展都相當緊湊。噚晚一集講到日本越發干涉朝鮮嘅事務,李秉憲及飾演日本大佐森隆史嘅男星金南熙兩位昔日嘅友人,亦多次喺不同場合針鋒相對。金泰璃爺爺相約李秉憲及柳演錫見面,想兩人保護金泰璃,不過金泰璃為咗救國而繼續義兵嘅行動,令佢嘅處境更加危險。
另一方面,卞耀漢想開設自己嘅報社,憑自己嘅文字救國,卻不斷被親日派拉攏,同時,因為金敏貞父親金義聖係親日派嘅大臣,卞耀漢家人為咗生存,就打算將佢同金敏貞湊成一對,令卞耀漢大感無奈及傷心。隨後朝鮮大臣遭受綁架,日本逼迫朝鮮簽訂《日韓議定書》,想正式侵占朝鮮。
更多韓流,喺晒《娛果》
http://fb.com/appledailyent