有移居美國多年的親友回港，為的就是要提取舊年派嗰六千塊。為免引起「發窮惡」（套用他對現美政府的評價）嘅疑竇，他早早就取消了所有在港的銀行戶口，所以要特地返港親身辦理，亦造就咗久別重聚嘅難得機會，相比派錢呢件好心壞事，咁點算係無端好事。本來佢諗住等埋前日新嘅預算案公佈，睇吓仲有咩驚喜先至返美，但係我拍哂心口話，若然財爺仲敢派錢，我未領嗰份六千銀可以俾埋佢！

最後當然可以慳番，不過因為返港無名，親友唔知幾時先會再嚟，難免有些不捨。不過派糖也好，派錢也好點都關係全港市民（唔好意思，多年移民不在此限）嘅利益，用得其所才是掌管香港財政大權官員要把的關。今年施政報告公佈後，財爺一如既往，出席各大傳媒諮詢會，又要到立法會受那些議員質詢。很多人認為今年財爺份預算案了無新意，長遠政策乏善足陳。查實報告內容又要幾有新意呢，佢又唔係要搞創意會計或產業。
而噚晚返到香港睇電視，有女記者問財爺，為何每年政府收入都較預期為高，點解數字唔會準確啲？我諗呢位記者應該唔係跑開財經新聞，就算係上市公司（包括小號）又有幾多能夠準確預估營收和損益？正式係講幾多錯幾多。而公僕更要識得預期管理，留番多啲走盞位先係為官之道，講真其誤差度起碼拍得上坊間財經演員！加上民怨從來唔係因為估多估少，而係派多派少。

現屆財爺作為香港的CFO（財務總監），除咗唔識打大鱷、買車同品紅酒外，我都覺得算係咁。正如在一間上市公司的稱職CFO，一係懂得財技，有本事將股價舞高弄低；不然，只要守住盤數，應使得使，應慳得慳（不幸的是我公司嗰位CFO實屬後者）就好。去年財爺就因為先嚟新搞作，注資強迫金，跟手頂不住政客及輿論夾擊，貿貿然開庫，大派6000元，最終搞到吃力不討好，民望急跌。反觀今年他選擇了退稅及提高免稅額，紓解中產壓力之餘又可省回不少行政費用，當然稅基更為收窄又是另一課題。縱使有指今次預算案中的政府對所謂一些N無完全漠視，令他們不能成為受惠的一群，但在政府處於交接時期，一份實而不華、悶到無倫的財政預算案，相信遠遠會較一份全民派糖好大喜功的來得較為容易接受。
盧先亞