韓國人氣劇《雲畫的月光》0依家好Hit，當中男女主角朴寶劍同金裕貞都爆紅，之前有提及23歲嘅朴寶劍出道5年，都有唔少緋聞，當中仲同35歲嘅張娜拉傳出緋聞(相關連結： http://bit.ly/2dm9mT6 )。

至於啱啱喺前日度過17歲牛一嘅金裕貞，雖然佢出道十多年，但因為始終仲係好細個，所以鮮有緋聞。不過佢喺去年5月就曾驚爆緋聞，當時年僅15歲、仲係未成年嘅金裕貞就同韓劇《憤怒的媽媽》對手男團B1A4成員BARO傳出戲假情真。

根據當時傳媒報道，金裕貞同現年24歲嘅BARO被目睹約會，喺當日直播嘅足球賽時中，佢哋就被影到一齊坐喺觀眾席上睇賽事，因而傳出撻着。唔知係唔係因為金裕貞未成年關係，所以佢對傳出緋聞都好避忌，佢公司仲即急急澄清，否認同BARO係戀人關係，仲話同場仲有另一童星徐信愛，當攝影機影到佢哋時，剛巧徐信愛就唔喺座位，所以先引起大家誤會。

而BARO亦都口徑一致，話當時有其他朋友在場，力證佢同金裕貞唔係情侶關係。