申請領匯 - 左丁山

蘋果日報 2005/11/18 00:00


領匯再度上市,據報反應一般,與去年五十萬人申請嘅情況,相差好遠。左丁山舊年申請到兩千個基金單位咁大把,食之無味,棄之可惜,卒之俾盧婆婆搞「灣」咗,雞肋都冇得食。
星期二(十一月十五日)街上撞到尊貴的議員大班,當然埋怨佢阻人發達,領匯上市遲咗一年,投資者賺少咗錢。乜唔係,舊年上到市嘅話,隨後幾個月樓市上升,相信領匯股價都會水漲船高也。
大班窒番過嚟:「你為自己荷包着想,我為政府、納稅人荷包着想。唔該你睇真啲,領匯去年估值二百九十三億元,今年估值三百三十八億元,升咗四十五億元,梁展文都識得話現時房委會最少比去年多收十億元啦!房委會收多十億,減去舊年上市不成,多花一億元籌備費,仍然多收九億,有乜唔好呀?係公帑嚟嘅噃。」
大班一輪口水,不減名嘴本色,可惜吖,現在佢係尊貴的議員,在立法會發言限時限刻,完全冇得發揮,冇乜癮。
星期二啱啱宣布「策發會」成員名單,大班榜上有名,但佢立即辭職,玩嘢呀?大班解釋話:「當初話明『策發會』只有一百人。現在竟然多咗53%,有成一百五十三人,開會點講嘢呀,我即係做花瓶啫,我會唔做。」第二日(星期三),佢果然宣布辭職,有冇人替補大班呢?照計唔使咯,一百五十二人與一百五十三人嘅「策發會」,邊度有分別。
同大班講咗一輪,諗諗吓都覺得領匯值得長期持有,可以申請。最麻煩就係搞餐死,最後又只係得到二千股。用孖展申請,怕怕地蝕息,咁嘞,小注怡情,希望能收到散戶優惠5%之後,仍然有着數。問大班制唔制,大班即刻鬧:「我點會申請呀,況且立法會議員不宜申請。」佢唔申請與我無尤,只希望大班今次唔好再玩一鋪啫。