鄧達智（William）同陳爽今日喺鑽石山出席閱讀分享活動，其中鄧達智嘅書本係講述自己早前一個長達三十日嘅旅程，孤身由英國、法國、西班牙、葡萄牙再到馬爾他嘅徒步之旅。William接受訪問時話呢個旅程自己籌備近20年：「因為工作、自己健康而且媽媽生病等等一再推遲，終於早兩年喺意大利旅行期間，因為牙患搞到瘦咗二十磅，同時發現自己呢個身型可以應付旅程，於是就一口氣完成佢。」

William透露丈夫陳醫生喺旅程尾聲先至加入：「佢依家私人執業後工作好忙，嚟緊農曆新年我計劃去印度南部旅行，佢都會陪我，不過又係因為工作所以要早走。」William又透露計劃日後退休會去意大利中部，鄰近佛羅倫斯嘅小鎮居住，佢話：「我同陳醫生都好鍾意喺嗰度嘅環境。」

另外，喺活動上向讀者分享育兒心得嘅陳爽，就表示老公今日負責湊仔，自己就出嚟活動，佢話最近幫大仔報學校相當忙碌：「要幫佢填好多份申請表，每份申請表都有一啲自我介紹嘅嘢，每日就喺屋企寫千字文，感覺好似番去我寫書嘅時候咁。」

精選娛聞，喺晒《娛果》
http://fb.com/appledailyent