日前王菲同謝霆鋒均現身巴黎出席時裝騷，而王菲好姊妹趙薇近日答應為霆鋒飲食節目《十二道鋒味》擔任嘉賓，有報道話趙薇拉紅線安排鋒菲嚟個世紀飯聚，但有指霆鋒婉拒出席，原因係怕觸動前妻張栢芝神經，不過王菲早已對報道回應過：「這是幻想來的，怎樣回應？」霆鋒亦被問到會唔會同王菲見面，佢就話：「我唔答呢啲問題。」

雖然大家睇唔到鋒菲重聚一刻，但兩人巴黎之行繼續各自各精彩。王菲除咗享受當地美食外，又喺巴黎街頭欣賞美景。噚晚王菲喺微博貼咗巴黎鐵塔照片，當然唔少得王菲靚相，相中王菲戴住超大頂帽，帽子遮住大半張臉，喺斜陽映照下，份外美麗，唔少粉絲都留言叫王菲喺巴黎玩得開心啲。

不過今午就有網民喺微博貼咗幾張王菲現身機場照片，相中王菲戴住墨鏡，唔知係咪坐長途機坐得耐，王菲步出機場時冇乜表情，不過網民就喜孜孜留言：「終於等到你﹗」﹑「彷彿如同一場夢，和你如此短暫地相逢。」睇嚟王菲似乎完成巴黎之旅，飛返北京咯喎。

至於霆鋒喺巴黎繼續拍攝飲食節目，而霆鋒粉絲今晨喺微博貼咗三張相，相中霆鋒化身型男廚神，喺度炮製美食兼試味，好Pro咁款，粉絲留言：「在酒莊拍攝的非常開心，我想大家都更加懂得美食與紅酒。難忘……」