「小小超」李澤楷旗下電盈(008)與香港電訊(6823)，年年要員工自費(今年位位180蚊)參加公司春茗嘅消息一出，即刻成為中環熱話，李老闆終於聽到大家嘅聲音，公司今日對內宣佈，李澤楷全數贊助今年週年聯歡晚會入場費。按舊年有近4,000名員工參加去計，總額約72萬，一百萬有找，對小小超真係碎銀喇。

據電盈與香港電訊員工所講，佢哋農曆新年開工一向冇開工利是，春茗亦要自費，小小超今年算係破例；畀咗錢嘅員工亦可以獲得退款。

有員工話，其實唔少同事已經畀咗錢，朝早聽聞老闆改變主意，請全公司去春茗都唔係好相信，直到人事部下午通知大家，寫明「同事如已支付費用，將會獲得退款。」真係覺得喜出望外，等於收到開工利是喇。咁呢次小小超的確係識做，順應民意。

蘋果財經，關心你飯碗
http://fb.com/appledailyatm