人氣韓劇《太陽的後裔》今晚就大結局，劇迷都好關心到底結局有冇人死，不過噚日就有好消息，《太陽》個編劇金恩淑接受訪問時就暗示劇集會係大團圓結局，仲話自己唔會再犯錯，唔想再畀劇迷鬧，可見佢會迎合劇迷合味，把故事寫成happyending。

而噚日網上就流傳一張宋慧喬披住婚紗嘅照片，即時惹嚟粉絲嘅起哄，由於喺《太陽》呢個敏感時期流出張咁嘅劇照，劇迷都即刻開心爆燈，以前雙宋喺《太陽》中有好結局，最終步入教堂，不過細睇喬妹張相，佢雖然着住婚紗，但個樣就好哀怨，似乎唔多開心咁，搞到網民都議論紛紛，唔知發生乜事。

眼利嘅網民亦即時認出呢輯婚紗照，其實係舊照，呢輯相係喬妹之前拍另一韓劇《那年冬天風在吹》時所拍嘅照片，絕對唔係《太陽》嘅新劇照，不過呢輯婚紗相已成功贏得粉絲嘅關注，亦都令到佢哋擔心咗一陣。

另外，由於眾人劇迷都想《太陽》大團圓結局，所以粉絲就只好自己製作雙宋嘅合成圖，喻意佢哋喺劇中能開花結果。