楊丞琳最近就同台灣組合JPM嘅王子（邱勝翊）傳分手，盛傳係因為兩個人聚少離多，所以和平分手。

啱啱拍完中台合拍偶像劇《一見不鍾情》嘅楊丞琳，冇得再寄情工作。噚日就喺屋企幫佢個「寶貝女」，即係佢隻史納莎狗狗補辦小型慶生活動，個心型蛋糕上面，仲有好多唔同形狀嘅狗餅裝飾，仲有大大枝生日蠟燭添呀！枝蠟燭睇落似個問號，其實係Yumi九歲生日先啱，唔通驚囡囡知道自己已經係「中女」，所以用咗問號？

其實，Yumi係前日（5月5日）生日，不過因為楊丞琳要開工，所以先遲咗同囡囡慶生囉。

楊丞琳喺微博話：「昨天幫5/5生日的Yumi補慶生，唱生日歌時，她居然跟著合！太可愛了。我的寶貝女兒，希望妳蛋糕吃得開心，謝謝姨媽送的大量零食！Happybirthday。」佢仲貼咗九張相，素顏嘅楊丞琳著住家居服同Yumi合照，笑容就幾開心，不過個眼袋真係好勁，戴住個大黑框眼鏡都遮唔住，希望唔係因為情傷，而搞到眼腫腫啦。

不過，楊丞琳有「女」萬事足，冇男朋友陪，有囡囡陪住都好幸福呀！