專門研究股神畢菲特投資心得嘅評論員RobertMiles，最近嚟香港巡迴演講，佢噚日出席美商會午餐會時仲話，股神揀股離不開企業盈利、股本回報、零負債、優良管理及簡單業務「五大法則」，但入市就要謹記「五大錦囊」，包括一）將股份當做一門生意；二）唔好因為市況變化，左右買入嘅決定；三）要留守安全界線；四）切忌感情用事；五）唔好借錢炒股。

佢話，股神嘅巴郡往往喺淡市表現最好，但家都有六隻股票要坐艇，包括石油公司ConocoPhilips、瑞士再保、美國地方銀行USBancorp、法資藥企Sanofi-Aventis、卡夫食品及強生，如果散戶家入貨，肯定平過股神。
Miles又認為，股神戰績彪炳，建基於自我培育嘅優良修養，除咗飽覽群書，仲好關心投資團隊，從來冇CEO轉職至競爭對手。大家可能都知股神同全球首富蓋茨老友鬼鬼，佢哋兩個都好熱心公益，但你又知唔知，原來佢哋兩個係「志趣相投」嘅好友，講嘅唔係「買股票」，而係「飲可樂」，股神一日要飲六罐可樂先夠喉㖭！