香港旅客減少，零售業開始叫救命，有商界中人同花生友講，最差情況未到㗎，估計過埋呢幾個月，就會越來越多公司頂唔住執笠裁員。正所謂遠水救唔到近火，自由黨、新民黨開始叫特首梁振英同中央講，加開自由行城市救命，但有政界人士話，今時不同往日，估計北京唔會咁易放行，其一係不少京官仍對香港心中有氣，其二係要趁機收拾本土派。
呢位政界中人話，今時今日主政港澳政策京官入面，好多人仍然對香港人逢中央必反，有事求中央打救、冇事就批評北京心中有氣，特別係某啲針對內地人言論，「唔少京官覺得有啲香港人小事化大，歧視內地人」。之前香港政府先叫中央收自由行，據聞唔少內地官員、特別係廣東省、深圳官員已經好唔妥，若然𠵱家又要佢哋開多啲自由行畀香港，恐怕好難，「有啲京官仲覺得，你哋香港人咁叻，經濟唔掂咪自己搞掂佢！」