華華記得長實（001）主席李嘉誠喺99年9月曾經公開講過，佢個人、公司同埋家族，都一定唔會投資與賭相關嘅行業，皆因賭博同佢醉心嘅教育及醫療項目有衝突。華華無啦啦講呢單舊聞，原因係──超人同內地福利彩票合作。
定啲嚟，華華係想講，超人同內地福利彩票合作……做善事。據新華網報道，民政部投入本級福利彩票公益金5000萬人仔，加埋李嘉誠基金會捐5000萬人仔，即係合共1億銀，喺新疆維吾爾自治區人民醫院啓動一個名為「重生行動」嘅活動，主要係資助班家貧又天生兔唇嘅小朋友做手術，等佢哋可以康復過番正常生活。

講真，對超人嚟講，1億銀好濕碎，自己捐晒都得，不過，同民政部一齊做善事，意義就大好多喇！李嘉誠基金會代表李玉光話，今年將會對新疆貧困家庭，同患有唇腭裂及相關畸形嘅0至18歲小朋友同青年，給予免費手術矯治，兼補助患者同一位護理人員，喺住院期間嘅住宿費用兼交通費。好有意義！
超人曾經講過，除咗公事上唔想沾手賭業，佢本人都好少賭，40歲前未賭過一個仙，連港人至愛嘅麻雀佢都唔識，鋤大D係半百過外先有人教佢。佢只會賭波，但唔係足球而係高球，賭本除咗錢之外，仲有食物，有錢佬嘅嘢，真係估佢唔到。

電郵：mailto:[email protected]