當年今日

股壇瀏覽器:第一德勝古仔多

蘋果日報 2002/02/09 00:00


港股噚日反彈109點,收報10518,但成交就縮減至62.85億元。大市開始淡靜,照計噚日恒指唔再大跌,下周一只得半日市,外資如無意外都唔會點沽貨,即係話基金減磅行動已經完成。
第一德勝(918)前日遭斬倉,下瀉近70%,噚日一度反彈近80%,其後升幅收窄至27%,收0.58元。阿虎聽到個古仔,前日有人趁莊家無力護價而出力沽空,雖然股價被大幅質低,但仍未能迫出大莊家手貨,噚日有人黃雀在後大挾淡倉,因此股價大幅急升。
不過黑客來料話,沽空之說未必真確,因為據佢所知,一間華資證券行原本揸咗唔少第一德勝,隻股一路升佢就一路減持,直至前日剩低幾百萬股,由於想年尾清貨套現,加上睇死個莊短期內都冇錢買貨,所以大手出貨,刻意質低隻股,等候靚價低吸,但其間並無沽空。黑客又話,家陣做證券行,自己唔落場炒,好難搵夠皮,如果唔係咁點養起成間行咁大棚人?

意科不宜博反彈
Cookie報料話,大家要小心意科控股(943),因為股價已經跌破1元關口位,如果莊家守唔住,情況就會好危險。技術上,隻股喺0.90至1元水平形成三底支持,表面上睇嚟好穩陣,值博率重唔錯㖭。不過隻股由去年10月約2.95元跌至噚日收市0.97元,莊家現時嘅實力值得憂慮,守唔守得住令人懷疑。
地鐵(066)宣布今年凍結收費,美其名就話係要與市民共度時艱,不過地鐵去年乘客量微降,而且巴士與邨巴嘅競爭激烈,呢一點JackSo應該心知肚明。喺整體通縮情況下,運輸業隨時會展開一次減價戰。