謝安琪今日去到新城接受訪問，宣傳新歌《人妻的偽術》，Kay透露新歌係講述夫妻間相處，唔一定要太坦白，言語上要剪裁吓，佢仲爆當中有啲係佢同張繼聰之間嘅相處實況，仲叫大家估吓，而Kay又話唔少朋友聽咗呢首歌都有共鳴，打畀佢講好多夫婦間嘅秘密。

提到大仔張瞻小學畢業，Kay就話佢哋兩公婆都好感動：「真係好開心，希望佢成長成為一個健康善良嘅人，我哋已經好開心。」講到張繼聰感動到喊，Kay就笑話：「佢感性啲，我都有㗎，其實畢業禮早幾日諗到我已經嚟，估唔到佢咁大隻，啲感情咁露出，同佢啲肌肉一樣突出嚟，好得意，都唔知佢咁，不過我睇番啲片都感動㗎，小朋友同我講『you should be proud of yourself』。」

石詠莉（Sukie）今日去到新城為《勁爆樂勢力》擔任嘉賓主持，Sukie透露前日啱啱喺東京返港，今次去日本4日，為全新大碟拍封面同MV，而老公鄧健泓就擔任總監同導演，Sukie話：「入行咁耐未試過咁地獄式通告，夜晚12點瞓，凌晨兩點就起身化妝整頭，每日拍10幾個鐘，依家黑眼圈跌到落下巴，依家要沖電。喺嗰邊因為要拍日出，要追光，又因為雨季，所以團隊都好緊張。加上大阪日前地震，有傳會有主震，所以都擔心。」而8月Sukie就開始採排舞台劇《慾望街車》，佢仲話同演員們好有火花，好期待。

精選娛聞，喺晒《娛果》
http://fb.com/appledailyent