【新增影片】
李斯特城今季喺英超作客未贏過，諗住周三歐聯16強首回合作客西維爾都凶多吉少，早啲玩完專心護級好過，但呢隻狐狸喺歐聯寧舍生猛，喺對手全場22次射門而自己得一次攻門中框下，仍然靠占美華迪取得重要作客入球，僅負西維爾1:2，次回合返主場仲有價講！

西維爾喺比斯桑球場地頭出擊，一開波就採取主動，14分鐘就靠阿根廷射手祖亞昆哥利亞搏得李城隊長韋斯摩根侵犯輸12碼，但佢親自操刀俾卡斯柏舒米高救出。可惜舒米高救唔到幾多球，西維爾25分鐘靠沙治奧艾斯古迪路左路傳中，沙拉比亞無人看管下頭槌飛頂破網領先1:0完半場。

換邊後西維爾繼續攻，雖然馬捷恩佩雷斯射門中柱，但好波之人祖維迪62分鐘發難推足半場，再傳畀祖亞昆哥利亞輕鬆射入將功補過，擴大優勢至2:0。不過，全場捱打嘅李城喺73分鐘突然爆發，真禾特同迪馬雷格雷一次「撞牆」後傳地波，華迪撞射破網追近1:2，近380分鐘上陣第一次射門中框就入波啦！餘下時間西維爾有守將阿爾拉米頭槌中楣，最終只能小勝2:1，3月15日作客王權球場踢次回合，出線未穩陣！