天文台今凌晨相繼發出黃雨及紅雨警告，多處地方滂沱大雨出現水浸。今凌晨約2時半，在紅雨警告下，一對居於天水圍田廈路新生村的年老夫婦，亦被洪水圍困，要由救援人員救出。兩人救出時衣衫盡濕，甚為狼狽，其中姓林(75歲)丈夫需蓋上毛氈保暖，其姓黎(72歲)妻子則赤腳，兩人被送院檢查。住在老夫婦對面的羅姓鄰居，自言每逢下大雨就「唔敢瞓」，「一聽到落雨超過15分鐘至半個鐘，就驚會被浸，如果黃雨、紅雨，就實浸梗了！」他期望政府能做好渠務疏導工程。

羅先生說，昨晚水浸到腳眼，住在他對面的老夫婦位處低窪，水浸更加嚴重，「消防員嚟到話水浸過膝頭，當時5、6個消防員，揹走阿伯，扶住阿婆，救走佢哋。」被問到是否每次大雨都會水浸，羅坦言「因為依家有人亂咁填去水渠」。「每逢落咁大雨唔敢瞓，我只係恰咗一陣間，醒咗床底嘅拖鞋就浮起咗！」他說每次落大雨都提心吊膽，「如果防洪渠排得切，就唔會浸，就係防洪渠去唔到水。」

他指有關情況持續十年，「政府咩都冇做，有邊個設施係政府做？冇做任何設施，今年才有人清刮開渠，平常雨水及時排到去水渠，但去唔到就冇辦法， 當然希望政府開大啲渠，政府任由人填（地），但唔規劃設渠，又唔要求人設渠，任人填，猶如一個鑊。我哋兩家係鑊底，水浸基本都會浸我哋兩家，衣物同電器等要墊高，曾試過浸壞了。」

他又指去年浸過一次，成一米深，甚麼都報銷，另一家浸至電器翻轉頂着門，要破門才能逃生，走遲一點就淹死了。他說當然擔心，下雨逾15分鐘至半小時，就擔心會被浸，若黃雨和紅雨，就幾乎必浸了，「你任由人填都好，疏水渠務始終要做，渠務處嚟睇過一次，但得個睇字。」

-----------------------------
打國際線 《蘋果》英文版免費試睇 按此了解更多
英文版已登錄新版《蘋果》App按此下載/更新
-----------------------------
你敢爆，我敢獎！ 立即WhatsApp《蘋果》24小時爆相爆片熱線 或致電：63836568