昨晨驟見儀征化纖（1033）隨大市高開至4.5元，星俠心諗，莫非炒上「時機」已到？正想笑出來之際，卻發覺港股急升700幾點，創30025點歷史新高後，走勢似乎不太對勁，果然稍為猶豫望多兩眼，指數已倒水般傾瀉而下，儀征股價自不免跟隨大市走，升幅大為收窄。不過，儀征有股改概念，加上H股與A股折讓達70%，後市不乏炒作誘因，未有貨在手者可考慮低吸。
恒指昨日早段急升，主要係受AH股互換傳聞刺激所致。不過，中證監事後回應有多個版本，一來例行否認，並指市場及媒體誤解屠光紹言論。星俠相信，今次又係另一被「吹大」事件，類似早前的「港股直通車」，昨日不少國企股高開低收，形勢上已見暗湧，高追的散戶要小心。

目標價睇8元

大行報告的威力有時真不能小覷，好似大摩話睇好駿威汽車（203），目標價調高至6.46元，即使該股事前走勢欠佳，跌穿10日線，但一樣受刺激大幅炒上，股價一度高見5.4元，雖然最後只收5.1元，但其大升已令散戶留意其他汽車股。
東風集團（489），去年銷售增長26.3%至75萬輛，今年銷售目標則在90萬輛至95萬輛之間。集團上半年銷售已超過45萬輛，相信全年應可順利達標。
東風本月初升抵7元後以長方形整固，若見大成交突破橫行區頂部，可伺機吸納，目標價睇8元。