姜大衛、程芷渝、吳志雄、李中希同Mr嘅Ronny，噚晚喺尖沙嘴出席網絡電影《黑金叛變》慰勞宴，姜大衛本月29日就係佢嘅七十大壽，女婿曹永廉噚晚驚喜現身，為外父提前慶祝，氹到佢笑呵呵，壽星公話：「希望所有觀眾都鍾意睇呢部戲。」姜大衛話正日生日開緊無綫劇集《誇世代》，要喺工作中度過，到時同劇組一齊過。姜大衛外形睇落畀真實年齡年輕，佢話：「做人最緊要開心，我唔使埋位，成日同公司同事吹水，好開心，我平時又會做吓運動，有時拍吓打戲，雖我有少少肚腩，不過遮住唔係好覺，但體力比以前係爭啲。」姜大衛大話戲中扮反派，有別過往扮開嘅大俠。　

姜大衛仲爆料話二女同女婿，將會帶埋兩個外孫，過幾日由加拿大返港，此行專程同佢賀壽，姜大衛話：「見兩個孫我好冧，因為佢哋一年只見一、兩次。」姜大衛話22歲孻仔已拍拖：「佢讀緊大學最後一年，佢咁年紀，唔拍拖我就驚，我當年都係26、27歲先結婚，要有經濟基礎，儲老婆本，冇理由成世問老竇攞。」同場程芷渝話呢次參演因為幫契哥手，所以只收5位收字片酬，比內地拍戲減收一半，佢仲話稍後同一間上巿公司7月合作開戲，預計大約三百萬，男主角係吳啟華，佢仲爆吳啟華片酬好貴。