鄭融前日在將軍澳出席商場活動時，被一名男子胸襲非禮，其好姊妹薛凱琪（Fiona）也有受襲經歷，她08年2月出席商場活動時遭一名男fans用膠樽擲中頭部，該男子即時被捕。
Fiona昨日在電話中說：「意外呢啲嘢好難講，都好難怪保安，因為有時行動太快避唔切，藝人出席活動都想同fans拉近距離，有啲係友善咁握吓手，所以難免有人走近身邊，我覺得要懲罰呢個人，畀佢一個教訓，始終係非禮喎。」對於有指女藝人衣着性感會令人想入非非，Fiona認為這是個人問題，不會因為着樽領衫就沒有非禮案，她說：「着比堅尼唔代表可以受侵犯。」
湯盈盈也曾在街頭遭掌摑及被罵「八婆」，昨日她在電話中說：「我覺得藝人出席公眾場合有意外好難避開，好在啲商場騷一定有保安，我唔認為係同衣着打扮性感有關，呢啲係家教問題。鄭融出過咁多公開活動都冇事，呢次係個別例子，我覺得應該要告佢非禮，畀佢一個教訓。」

傅穎雙手護胸

此外，傅穎昨日在尖沙嘴出席一個手錶活動，她說：「佢報警做法好啱，唔可以姑息養奸，我04年都試過喺酒吧做騷俾人摸胸，所以喺人多地方要雙手護胸保護自己，我身邊熟口熟面嘅fans有時都會做咗我保鑣，唔熟眼嘅就會保持距離。我同鄭融係同一個歌唱老師，我會sms問候佢，知道佢現時心情會好亂，但要靠自己克服。」
採訪、攝影：陳寶明、卓寶花、仇志德