施恩莫望報，好心卻要報──報稅個報。八方近日從官場聽到單料，話說有個高級政務官，月薪逾10萬蚊，佢樂善好施，平均每個月都撥3%人工（3,000幾蚊）行善，一年到尾捐出3萬幾蚊，對一般人而言唔算小數目，不過近年佢每年都俾稅局抽秤，質疑佢係咪真係咁好心，要求佢提供捐款收據。

年年查核捐款單據

做官嘅由庫房出糧，收入一清二楚，佢亦唔敢亂報數，對於稅局連年追問捐款紀錄，呢位AO不勝其擾，向稅局查問何必次次選中佢，稅局回覆卻令佢O嘴。稅局表示，根據全港打工仔報稅資料，有佢咁高薪嘅納稅人，捨得捐出月薪3%做善事嘅絕無僅有，為免發生渾水摸魚情況，有損庫房稅收，所以要小心啲查核有冇人報大數。
至於點解呢位高官年年都咁好彩，原來係因為稅局電腦set咗，如果發現有納稅人捐錢紀錄好「突出」，就會自動發出通知書要求覆檢捐款資料。稅局更表明，由於唔會更改現行電腦程式，所以可見將來會繼續年年打攪佢，當官僚遇上官僚，都冇晒符。