特區開始換智能身份證,特首、一眾高官以及尊貴嘅議員們都享有特權,可以先換,白鴿黨前主席李柱銘日前都去咗換證,不過就搞咗好耐都唔掂,原來皆因佢老哥唔夠左。
馬丁同八方講,今次換證,要做兩次套取指模程序,佢喺第一次嘅時候,右手手指好快搞掂,但係做到左手,個官就話「李議員,你隻手唔夠左」,剛好何志平局長又喺度做證,就笑住搭嘴話「梗係啦,李議員梗係唔夠左啦」。個官嘅意思其實話馬丁隻手放得唔夠左,於是馬丁向左移一移,先搞得掂。
要問小小超
馬丁跟住做第二個程序,隻右手又係一次搞掂,輪到隻左手,架機點都記錄唔到,最後個官只好放棄。咁即係話,以後馬丁出入境,只能用右手核對資料?
馬丁都覺得部機器好騎呢,睇清楚係八號仔出品,於是決定下次見到小小超時,當面問佢出咗乜嘢事?抑或係佢自己隻左手有事。
講開又講,呢輪老董話乜都唔做住,一味話搞好經濟,呢個當然係阿爺意思,但係馬丁好唔同意。佢話7.1五十萬港人上街,明明係反對23條,同埋加快民主,咁老董同北京一味當聽唔到,夾硬當嗰次遊行係「經濟行」,令馬丁好唔忿氣,「我哋係正式嘅民主自由行,老董點可以只係搞經濟就算數!」
傳真︰2623-9278
電郵︰[email protected]