上周從賽馬媒體得知早前的一次賽事，有馬迷用馬會Apps下注騎師王，但翻查投注紀錄，下注的騎師名宇，竟包括當日停賽的莫雷拉！

馬會事後證實了這是Apps投注紀錄顯示資料出錯，並不會影響派彩，既然有這宗從沒有人想過的「意外」發生，是否也告訴馬會要對本身電腦系統多加自我檢查防範於未然？

季內已曾發生網上投注失靈，加上今季使用馬會網頁，耐不耐彈出對不起資料未能更新的頁面，雖然多很快回復正常，但起碼證明馬會的電腦系統不是百分百健康，只怕小病不去醫，到大病才正視，可不是大事能化少！

平心而論，馬會的Apps及網上投注介面不算難用，但其中一項需要重點改良的，是在下注過關時仍有使用困難，皆因在現行運作，如果下注混合過關時，在最後覆核下注組合時發現有錯，譬如選兩匹馬買單Q及位置Q過關，最終原來唔記得揀該場投注項目選項，該關變了過兩隻馬獨贏，現行用家只有整條飛刪去從頭到尾再入一次。

如每關組合不多，加上可能只過兩三關，再入過又未算太煩，但如每關注數多及過四至六關的話，重新入過固然花時間，仲要再一次金睛火眼對飛，因為過關填錯變唔中的話隨時大大鑊，最弊是臨開跑才落注，亦有機會重做唔切。