已經81歲嘅「四哥」謝賢，雖然近年作品唔多，比較有noise嘅係大台套劇《賭城群英會》，不過佢財來自有方，早排四哥被揭以8,500萬元買入淺水灣道單幢低密度住宅怡峰（新聞連結： http://bit.ly/2gEbUl3 ），令佢晉身南區業主。

生活寫意嘅四哥今日下晝5點幾，以一身招牌打扮——墨鏡、黑色外套加紮住條小馬尾，現身中環置地廣場一間佢經常幫襯嘅餐廳，與一名白髮友人嘆甜品，其間有相熟侍應埋嚟打招呼，佢哋兩個嘆完甜品後，仲好悠閒咁坐喺度吹水，傾到一半，再有另一位白髮老人家加入，睇個樣係有排吹嗰隻，所以都咪話「三個女人一個墟」，3個男人一埋堆都可以傾唔停㗎！