獨立電影《十年》因影片內容敏感，遭內地官方全面封殺，但今年4月舉行嘅第35屆香港金像獎卻拗頸頒咗最佳電影俾呢這部戲，事後代表老闆嘅香港電影商協會同香港影業協會亦都對《十年》得獎好有意見。當時寰亞老闆林建岳、寰宇老闆林小明同天馬影業老闆黃百鳴等先後表態，鬧爆賽果令人失望，要求金像獎董事局檢討評審機制，又威脅會退出頒獎禮。

上月香港電影金像獎董事局開咗大會，由影協主席洪祖星代表正式提出改制，要求第二輪評選取消以專業人士作為評審。《蘋果》收到消息，指13個屬會代表開大會時，當洪祖星話代表老闆會同影協兩大屬會提出金像獎改制，表明不應該由專業評審控制最後一輪評選(佔55%)，不過現場其中4大屬會反應激烈，拍晒枱話唔贊成，董事局主席爾冬陞就話下次開大會時，大家再投票決定是否改制。。

《蘋果》致電影協主席洪祖星，他承認確有提出金像獎改制：「《十年》得獎，業內同外界反應好大，覺得呢部戲唔應該得最佳電影，所以我哋嘅影協同老闆會都覺得第二輪評選入面，50位(應為55人)專業評審佔咗55%評分，等於由佢哋控制晒賽果係好唔公道。」

影協同老闆會提出之方案，如下：
1.提議取消第二輪有專業評審部份，改為由13個屬會，一人一票選出最終得獎結果；
2.55位專業評審可參加首輪評選，但就不再佔有55%評分，變成同13個屬會會員一樣，只係得1分。

洪祖星稱，這個新機制「會比較公平」，問他其他屬會反應如何？佢話：「未知㗎！等下周(19日)開大會，大家討論囉！總知影協同老闆會係全部會員成改制，如果到時通過唔到，我哋再諗下點算啦！」

寰宇老闆林小明接受電話訪問時，被問及老闆會是否有提出改制要求？他承認：「係，老闆會由影協做代表，要求金像獎改制。」