【李八方online】林鄭換衫再登場 黑色套裝裙撐呂志和獎
林鄭李八方呂志和獎
曾蔭權白西裝襯紅煲呔,望落好醒神,拖住太太恩愛撐場。黎樹雄攝
「呂志和獎-世界文明獎」今晚舉行第二屆頒獎禮,中國氣候變化事務特別代表解振華、提倡「耕者有其田」嘅國際非政府組織蘭德薩農村研究所,以及國際殘疾人奧林匹克委員會,分別獲得持續發展獎、人類福祉獎同正能量獎。每位得獎者獲現金獎2,000萬元同獎座,其中一位得獎者解振華決定將獎金捐畀母校清華大學,為可持續發展研究作出貢獻。
同往年一樣,頒獎典禮嘅嘉賓都星光熠熠,上午現身行會時著白衣嘅特首林鄭月娥,改換黑色套裝裙登場,前特首曾蔭權亦同太太拖住手出席,全國政協副主席董建華、中聯辦副主任譚鐵牛及多位司局長亦有撐場。
林鄭發言時除咗大讚三個得獎者,當然又提及施政管治,佢話促進社會和諧係佢任內嘅首要任務,根據佢過去三個月觀察,反映佢向正確方向前進,佢仲提到下星期發表嘅首份施政報告,會訂下5年施政目標,保證施政報告內容會同大家嘅核心價值一樣,會有圍繞教育、扶貧同促進和諧嘅措施。
呂志和發言時就講到聽日係中秋,而中秋代表團圓、和諧同感恩,正係呂志和獎想表達嘅精神,提早祝大家中秋節快樂。