梁小冰噚晚喺圓方出席環保電影《地球奇妙的一天》首映禮，小冰話本來想帶小朋友嚟睇：「o依家小朋友兩歲已經懂得垃圾分類，學校有教！」唔經唔覺阿仔今年都已經10歲，佢同老公陳嘉輝都係藝人，唔知佢又有冇諗過同阿仔拍真人騷，小冰話：「唔好搞喇！做公眾人物壓力好大，個仔自己本身都唔鍾意影相，平時我擺啲相上facebook同微博，如果畀佢知道會話我冇問過佢就擺，佢自己對入行都不大興趣，只係想做個普通人！」

不過小冰話阿仔好有表演慾：「o依家佢跟Sunny Wong學習跳舞，佢都好鍾意喺課室上面表演，但係就唔鍾意做公眾人物， 因為佢知道唔會有太多自己嘅空間，非常大壓力。」

同場嘅譚玉瑛自己平時好少買嘢，啲錢都係用嚟食曬落肚，對於鼎爺私房菜新店開張，譚玉瑛首天已經去咗捧場：「佢第一日開張我都有去有試咗食，係唔收我錢。」對於有食客指鼎爺啲餸菜麻麻哋，譚玉瑛話：「可能有啲食客會重口味，鼎爺口味偏向健康。」至於有冇諗過自己開餐廳，譚玉瑛就話：「任何關於食嘅我都冇興趣搞，因為好辛苦！」