【笑到最後】武肺篤爆香港資產神話（高明）
蘋果日報 2020/03/29 12:53
高明笑到最後
今次武漢肺炎對經濟嘅打擊，係最基本嘅需求問題，連街都出唔到，只靠外賣同生活必需品，又使得幾多錢？
美國首次申領失業救濟人數破紀錄達328.3萬人，同時美股大幅反彈，彈兩次千點，金魚記憶，差唔多已忘記一個星期前的恐慌模式。
股價走勢可以因為量寬等資金因素而唔跟經濟，失業冇得呃。等人用，就要請人，請唔到就要加價搶，情況有如自由行滿瀉時，茶餐廳開價五皮包辦洗碗，冇生意就要縮皮。
今次武漢肺炎對經濟嘅打擊，係最基本嘅需求問題，連街都出唔到，只靠外賣同生活必需品，又使得幾多錢？如果美國就業情況，傳染到香港同中國，而疫苗遲遲未有，究竟對資產價格有咩影響？
一、寫字樓會成為高風險資產。因為只要一部手機已可工作，知識型經濟，生意好可以租個好樣啲嘅「扮工室」；經濟一差即削，變成非必需品。
二、大型商場模式已見頂。疫情失去旅客，做外賣只需要工場而非零售舖。如果失業率上升，啲人大把時間自己煮。疫情過後能否重返之前嘅高位，以香港嚟計都幾難。
三、樓價。講過好多次。樓價最後一根稻草係失業，有工開，有錢供，樓價根本不動如山，香港樓市有如宗教，加息嘅影響都好輕微，繼續供好過。真係出事，係被動冇錢供，包括失業。首先「呼吸plan」會陷財政危機。即使投資者供滿、唔怕失業，但租客失業斷租，一係減租再租出去，一係丟空。持貨本身有各項使費，而每過一年，天價大維修風險又增加。當本來一件月月生息嘅工具，變成一項開支，就係一個煩惱。何況過去五年樓價上升係因為按樓套現釋出購買力，只要樓價下跌，冇新購買力，甚至會倒嘔。
如果未來幾年疫情持續，搵食嘅生存空間包括：1.成本低嘅中小型企業。當你見一條Whatsapp假新聞可令米或廁紙掃清，香港人積落，錢係有，要靠消息刺激貪婪與恐懼，有能力快速應變嘅小型企業，似乎可以捱過呢一浪。
2. 依附政府，財赤都可以硬推一萬億元嘅明日大嶼，證明政府從來冇擔心過錢。粗粗哋拎幾個外判project，甚至可以放上IG話：經濟差，唔覺喎。不過，呢啲錢唔係人人賺得起。
高明
https://www.facebook.com/bigricetea
https://www.facebook.com/bigricetea