紅遍東南亞嘅歌星鄧麗君雖然已經逝世12年，好多歌迷仍然記掛佢嘅歌聲，小鄧生平傳奇，有人話有華人嘅地方，就聽到佢嘅歌聲，喺海峽兩岸關係最緊張嘅時候，佢嘅歌聲同時感動兩岸人民，有段日子內地甚至有人戲稱「不愛老鄧，愛小鄧」，「白天聽老鄧，晚上聽小鄧」，民間更盛傳連鄧小平都係小鄧fans，可見佢嘅影響力。

深圳新聞網噚日轉載一篇前任新華社香港分社副秘書長牛釗嘅文章，披露一段小鄧同中共官員秘密交手嘅往事。小鄧經常喺台灣演出勞軍騷，被國民黨譽為「愛國歌手」、「軍中情人」，中共點樣暗中統戰佢，令人好奇。
根據文章爆料，小鄧喺1986年初結識新華社香港分社人員，並主動提出想保持聯繫，但必須保密。牛釗就同兩位下屬負責同小鄧接頭，雙方熟絡後，小鄧不時主動相約請飲茶，後來新華社副社長喬宗淮更喺新華社赤柱別墅設宴請小鄧食飯。
小鄧身份特殊，一直無緣踏足大陸，佢對新華社官員講話好嚮往神州風光，想登長城睇雪景，據講新華社曾經提出小鄧可用假名持回鄉證北上。小鄧又話希望舉行巡迴演唱會，更表示只要內地批准，其他籌備工作由佢包辦，中方建議佢喺北京、上海、西安、廣州開騷，走遍大江南北。
小鄧1988年買下赤柱大屋自住，據講都係由新華社中人穿針引線，之後更幫佢搭路喺蘇州買屋，因為佢覺得喺台、港居住都有煩事，返內地先得清靜。

據稱小鄧得悉一間屋都係賣六萬蚊人民幣時，未睇樓已經想滙錢返大陸。小鄧上述「神州行」大計，最終通通未能實現，事關1989年六四事件中，小鄧同情學生，參加《民主歌聲獻中華》時掛住一塊寫住「反對軍管」嘅牌上台，後來佢話大陸一日未實現民主，一日不會踏足大陸。
六四後新華社香港分社大地震，小鄧又已經不在人世，雙方秘密交往三年往事，孰真孰假或者仲有冇更多內情，八方相信幾難查究，不過中共統戰無孔不入，重點拉攏喺演藝界有影響力嘅小鄧好正常，最可堪玩味嘅係，有人言之鑿鑿指小鄧其實係台灣「特務」，佢同中共官員交手，點止想旅行、開騷咁簡單？