【藝人應表態】森美重提7.21事件眼濕濕 坦言感失望
蘋果日報 2019/09/14 16:10
森美杜汶澤
（資料圖片、網上圖片）
森美在昨晚播出的杜汶澤的網台《CEO會客室》中，自爆有健康危機，但原來在節目的前半部，2人大談政治話題。
其中有觀眾問到森美在7.21暴力事件翌日，在電台開咪時爆喊，問到令他最心痛的地方是甚麼？森美坦言：「我嗰晚黑冇睇到，我係係朝早擘大眼嘅時候睇，啲嘢係咁loop出嚟，我個心焗……焗得好緊要，我而家諗番起嗰個心都喺度就係……（開始有點眼濕濕）喺嗰個衝擊裏面，我係見得到……好失望呀，即係點解會有香港嘅巿民打香港嘅人？因為真係見得到喺車廂裏面有啲婦孺、小朋友，捉住啲嘢走呀、好驚呀，嗰個景象太過令我震驚，令到我好激動。」他自爆在開咪前已經喊過，到開咪時一提起，又再激動，眼淚便奪眶而出：「我個人係比較眼淺，容易被情緒觸動，我係有啲失望囉！」森美更明言：「希望有一個理性嘅世界、理性嘅社會。」他又指自己和身邊的人都希望大家可以理性一點。
阿澤與森美均表示支持愛與和平，但就覺得現時可能因為雙方的情緒已經去到一個極度憤怒的狀態，宣揚愛與和平未必有用之餘，更可能會產生新的仇恨。
被問到覺得年輕人用「暴力」還擊社會不公是否合理這一點，森美說：「我自己本身冇任何嘅睇法，因為我唔係置身喺當中嘅人，我覺得有一樣好緊要嘅，喺用公民抗命去作為一個政治嘅手段當中，其實一個好重要嘅目的都係要拉攏，我唔知嗰個抗爭用唔用暴力，或者個暴力用幾多，唔到我講啦！反而我覺得佢應該諗吓，咁佢又需唔需要呢？佢哋要作出決定。」
近日有不少藝人就社會事件、政治事件表態，森美認為藝人應該可以表態：「政治嘅意思係乜嘢？政治就係一個3個人就會產生嘅嘢，政治就係，究竟第3個人去邊邊，所以喺生活當中整體上都係充滿住任何嘢都係同政治有關。對於呢個事嘅表態係好正常嘅一件事嚟嘅，只不過係唔同嘅社會裏面，當佢表態過後，所得出嘅影響有幾大，打個比喻，嗰個藝人佢講咗出嚟，佢影響嘅所有人都係好理智嘅，唔會因為佢係一個藝人，然之後我信佢嘅，咁我覺得一個藝人可以講，但係如果唔係喎，如果嗰個藝人話『喂唔係喎，我啲fans全部都係冇腦㗎喎，即係我唔講由自可，我一講佢淨係跟我㗎喎！因為我靚仔㗎咋，唔係因為我個觀點同我個角度同我個諗法。』咁就唔好荼毒佢哋喇。」
森美重提7.21事件，坦言當天看過消息後，心情激動。（網上圖片）