多得杜汶澤惡搞，話蔡思貝個樣同日本萬人迷木村拓哉有幾分相似，加上最近獲張家輝賞識，搵佢做新片女主角，令思貝火速上位。不過人紅自然是非多，最近有雜誌訪問思貝有關圈中「處女黨」嘅敏感話題，佢冇一口承認或否認自己仲係咪處女，反而覺得處女黨只係綽頭嘢，除非有醫生紙證明，唔係好難作實，似有單挑成份。

鍾嘉欣：咁可愛？

身為TVB首席處女、現年二十八歲嘅王君馨，喺最先發表處女論嘅女藝人，佢曾經話過：「結婚嗰晚做先係一件amazing嘅事。」對於思貝挑機？君馨噚日喺電話度話﹕「每個人睇每一件事都唔一樣，有自己嘅自由。」會否用醫生紙證明？佢話﹕「點prove啫，其實我哋唔需要咩證明，因為我哋係尊重神、尊重將來老公，唔需要畀人睇，自己知就得。」君馨係虔誠嘅基督教徒，同苟芸慧、李亞男、鍾嘉欣並稱四大處女，而岑麗香、張慧雯等亦係「Amazing Esther」團契小組成員，早前蔡思貝宿敵陳凱琳亦話過會堅決守貞，令處女黨日益廣大。但對處女之身受質疑，鍾嘉欣都冇咁好氣，噚日喺電話答﹕「咁可愛？我冇回應。」
撰文：馮仁昭