【今晚播喇！】《造星II》參賽者當面鬧節目垃圾 姜大衛子、祖藍表弟50強止步
蘋果日報 2019/09/30 00:30
姜大衛全民造星姜濤姜卓文
ViuTV《全民造星》去年成功捧紅姜濤，由於姜濤出入都會引來大批fans跟隨，所以平日他會戴上黑口罩、穿黑衫出入，結果他昨日離開銅鑼灣寓所時，被克警截查身份和搜袋，認真無辜。
至於全新一輯《全民造星II》今晚播出第一集，會否成功捧到第二位姜濤仍是未知之數。不過《蘋果》接獲消息，姜大衛與李琳琳兒子、出身演藝世家的62號姜卓文（細John）和88號王祖藍表弟李俊華（孖八），雙雙在50強止步被淘汰出局。記者致電細John求證，他承認說：「第3 round就冇咗，因為我哋分組賽，可能準備不足，又好難夾音樂style，唔係大眾鍾意嘅音樂，我都覺得自己做得麻麻地，唱功唔叻。」
問到當時評判有甚麼評語？細John續說：「佢哋當時都係講呢番說話，分配得唔好，唔夠balance，rap少少又跳舞。」會否感到可惜﹖細John指自己沒有玩過這類比賽，在沒有經驗下就輸了，不過他未有灰心，說：「唔緊要，我都學到好多嘢，同埋識咗好多朋友。」提到個人表演分為自選及指定，細John坦言：「自選嗰part係OK，但指定嗰part，因為佢哋指定唱嘅歌，我唔熟，又多假音，當時自己又緊張。」爸爸姜大衛有沒有安慰他？細John說：「佢話唔緊要，冇乜所謂，最緊要學到嘢。」明年會否再參戰？細John說：「應該唔會喇，我希望簽公司入行拍戲。」
去年有份參加《造星》的梁德忠（Tank），今年再次參賽，但本周播出一集中，他竟跟監製黃慧君（花姐）炒大鑊，並繼去年退賽後再一次退賽，大爆賽果內定和鬧《造星II》是垃圾節目。事緣當日總綵排，花姐問Tank為何黑口黑面，Tank即勞氣地說：「其實我頭先諗咗好耐我講唔講好，由我一開始參加呢個節目嘅時候，我係覺得你好唔like我咁，你一路以嚟keep住叫我唔好參賽，你好快比人foul出局，直至到今日，有內定消息……」
花姐表示不知道Tank說甚麼，要求Tank離開錄影廠跟她講，Tank即說：「好，出去講。」說罷氣沖沖走去花姐面前用手撥評判鐘，然後退賽離場，其間Tank走出錄影廠拿起背囊大罵：「垃圾節目！內定！」花姐大怒，拿着咪在錄影廠反罵：「我未諗過有人喺我full dress（總綵排）玩嘢，咩態度呀！同我捉晒所有參賽者入嚟。」《蘋果》致電花姐了解Tank爆節目內定和垃圾節目，花姐大賣關子，但就透露Tank最終沒有退賽，繼續留低。
採訪：黃曉妍、魯吉
姜大衛兒子姜卓文原來已被foul出局。（資料圖片）
王祖藍表弟孖八（右三）亦50強止步。（資料圖片）
Tank爆節目有內定。（ViuTV截圖）
氣沖沖走到花姐面前撥鐘。（ViuTV截圖）
Tank離開時大駡節目垃圾。（ViuTV截圖）
花姐發火非同小可。（ViuTV截圖）