當年今日

新登場:
傳統印馬泰菜香而不辣最正宗

蘋果日報 2002/01/05 00:00


一般人以為印、馬、泰國人必定是無辣不歡,紅、黃、綠咖喱、沙律碟碟都要有咁辣得咁辣?當然唔係啦,深究三地的飲食文化,要做到香而不辣先至係最正宗嘅至高境界。最近進駐杏花新城的雙辣船,一店有齊以上三地較少有的傳統菜式,有辣有唔辣,以後唔怕辣到味蕾都麻痹啦!
記者:黃婉冰
攝影:伍慶泉
經理推介:印度滑汁咖喱雞$58
咖喱汁混了果仁、雞蛋、奶等多種配料,特點是香咖喱味但無咖喱的辣味,是古時帝皇級的專有食品,成碗汁,最好當然係叫個飯或者薄餅送嚟食。
試味報告:
香夾滑,夠濃稠,有少少似食白汁,有咖喱香,唔食得辣最好揀呢款。
大廚推介:甜酸汁䱽魚$95
泰國人最鍾意食䱽魚,蘸粉炸至香脆,配以不同味道的汁料或蒜茸,但今次大廚就改一改,淋上有齊酸、甜、辣三種味的甜酸汁,內有香茅、南薑、檸檬葉,更多一份香料味。
試味報告:
魚肉拆骨啖啖肉,外脆內滑,酸甜汁開胃唔太辣,有少少似五柳魚。
香草蒜茸青口$58
最傳統的咖喱乾汁,配合本地人最鍾意嘅青口,青口用蒜茸炒香,淋上以香料為主的印度乾咖喱汁,汁分量不多,啱啱好掛在每隻青口上,吊一吊味。
試味報告:
咖喱汁唔算辣,但好香,略嫌蒜茸味仍未夠,再多些少會更好。
醃牛肉沙律$42
唔再係去骨鳳爪或西柚,取而代之的是牛肉,牛肉用泰國香料醃過再燒,鋪上青瓜、番茄、洋葱、葱同青檸汁,想辣,可以蘸些用辣椒、蜜糖、檸檬葉調校的汁,傳統汁料,甜、酸、辣,咩味都有。
試味報告:
牛肉有青檸酸香,個汁就以辣當先,唔蘸汁食都夠味。
油鬆餅$16
馬來西亞街頭最常見就係呢款薄餅,同印式唔同,呢款薄餅係要用手不斷重複摺叠,再放在爐上煎,出來的效果先有層次感同鬆軟。
試味報告:
鬆、香、脆,香酥味加口感外脆內煙韌,同咖喱汁最登對。
泰式香蕉布甸$24
西米糕同芒果糯米飯Out啦,不如試呢款唔似布甸嘅芒果布甸,用椰奶加入粟米、香蕉肉煮成,以香滑為主。
試味報告:
椰奶有好香香蕉味,反而唔太覺有椰汁味,入口香滑又有粟米粒𡁻下,暖食最好。
印度乳酪有助中和濃味
印度人向來喜歡以乳酪入饌,除可用作醃料令食物味道更可口外,另一用途就是中和各種濃味。印度人在每餐當中,都會有一碗淨乳酪加入青瓜茸,再撒上少少香料,就咁食,入口清新帶有少少清涼感覺,作用是幫助中和口腔內濃烈香料味,是印度人傳統飲食習慣。
店名:雙辣船ChillieSark
電話:25566638
地址:杏花邨杏花新城G47-48號舖
座位:90個
營業時間:上午11時半至晚上十時半
付款方法:現金及信用卡(Visa及Master)