坤哥吳業坤噚晚喺新城勁爆頒獎禮慶功宴上，面青青冇食嘢，原來身體不適，皆因前一日食錯嘢，但佢仍然好貼心，為緋聞女友、Super Girls成員Aka畫展「HER」嘅作品被指涉抄襲解畫，力撐Aka話：「我都唔知，唔太清楚，但我相信唔係嘅，因為我嗰日都有去佢個畫展，有睇過佢啲畫，好似好精細，藝術成份好高，感覺到佢有情感喺入面。」

慶功宴上Aka都有出席，咁啱得咁橋，Aka原來都唔舒服，所以領獎後都冇唱歌：「因為發燒，搞到失聲，依家仲要食類固醇。」

講番畫作被指涉抄襲事件，Aka表示：「今次畫展嘅主題係以女性為主，即係以心臟為題去畫呢，每個人嘅心臟都係一樣嘅，而且我有啲圖畫係以頭髮或者裸體為主題，其實係有機會同某啲畫類同嘅，但我都好多謝大家有留意我嘅作品。」

投訴Aka抄襲嘅藝術家、巴西插畫家Thiago Bianchini喺Aka ig留言稱：「Based in one of my illustrations。At least you could tag me.」不滿Aka「抄考」其作品嘅idea當自己嘢，對此Aka表示：「我冇留意，冇睇到嗰啲留言。」但又奇怪喎，插畫家留言之後，Aka就刪咗個post。

Aka話：「入行以嚟，做每一件事都會有唔同聲音，我自己冇特別留意。總之我係冇抄襲。」一眾Super Girls成員如Heidi等都幫口，話Aka冇抄人，大家都提供idea俾佢、又睇住佢嘅創作過程。講到坤哥都好撐佢，Aka話：「咁多謝佢啦！多謝晒坤哥！」

【minigame】2017瘋暈人物 返工打機唔使擇日
http://bit.ly/2CeWQkP

更多娛聞，喺晒《娛果》
http://fb.com/appledailyent