【新增內容】

今日係香港回歸20周年，坊間唔少人趁住呢個時間，表明自己嘅愛國心，繼Twins成員蔡卓妍(阿Sa)同鍾欣潼(阿嬌)、劉嘉玲、林峯同陳可辛早前接受大陸媒體講1997年回歸嘅感受之後(新聞連結：　 http://bit.ly/2u93Xqr )，今日喺微博又有一段預告，見到成龍、周星馳、彭浩翔、唐季禮同林超賢等電影人，接受CCTV4——中國中央電視台中文國際頻道訪問，講吓香港電影喺20年嘅發展，推介一吓香港嘅特色嘢，最後少不免梗係希望華語片可以「前途美好」！

唐季禮就自我介紹係「我是香港導演」，跟住仲形容香港係很安全、很快樂同很自由，相信香港明年會更好。彭浩翔話嚟緊嘅工作重心會喺北京、香港同美國，未來希望可以有更多有遠見嘅投資者，令中國電影百花齊放，成龍呢？都係叫做「香港導演」，佢話：「希望更多中國類型電影，會被國際認同！」

同樣被稱為「香港導演」嘅星爺，佢話自己喺90年代已經北上發展，嗰陣接觸唔少大陸嘅工作人員，不過表現喺一個唔係好成熟嘅狀態，但係經過香港嘅人才同制度嘅啟發，0依家已經可以到互補。當日星爺監製嘅電影《美人魚》，成為大陸有史以來票房最高嘅電影，星爺話如果冇咗佢哋，未必有呢個效果，仲話0依家中國嘅市場更開放，更加具體，喺中國文化裡面，有太多原素俾佢去想像、去創作，佢又寄語：「華語電影繼續努力！」

係咪有啲誤會？佢哋有幾耐冇拍港產片？佢哋個市場仲係香港嗎？

除咗電影人之外，唔少藝人亦都有喺微博留言慶回歸，好似有愛國演員梁烈唯、歌手王梓軒、志雄哥、導演黃真真、丁子峻同埋何華超等等，容祖兒就轉噚晚喺文藝晚會嘅演出，留言話：「非常榮幸參與香港回歸20周年慶祝晚會，在此祝福香港繁榮安定，香港市民振翅高飛！」已為人父嘅梁烈唯，喺微博Share央視條「慶回歸」片落hashtag#慶祝香港回歸20周年，不忘加個中共國旗emoji。李國麟就話：「我愛祖國，我愛香港！」

真係見到都拳頭硬……因為真係好激動嘛。

相關新聞：
【回歸20周年】林峯稱「同祖國拉進一步」 嘉玲：依家返大陸仲有親切感
http://bit.ly/2u93Xqr

【生於英殖香港】惠州政協何家勁微博頌愛國 唔識分紫荊同洋紫荊
http://bit.ly/2srrPbF