艾列頓喺轉會史浩克04後頭頭碰着黑,重未喺德甲聯開齋之餘,重因打對手同冇依時出席藥檢而被罰停賽四場。佢想成功衞冕德甲聯神射手寶座,睇嚟都幾難囉。
上屆幫雲達不來梅贏咗德甲聯兼自己攞咗射手獎嘅艾列頓,今屆喺史浩克嘅發展認真麻麻。呢位巴西球員踢咗三場聯賽都未開齋,喺上周六對羅斯托克蓄意侵犯對手被逐,兼賽後冇依時出席藥檢(好彩事後即刻返球場做番)。德國足總就覺得佢冇紀律,於是罰佢萬五蚊歐元(約十四萬港元)同坐四場波監。
史浩克話明唔上訴,咁即係艾列頓頭七場聯賽都冇波入,所以佢想連續第二年攞神射手,睇怕都幾難。但史浩克重慘,佢哋諗住可以同拜仁、不來梅同利華古遜爭聯賽錦標,睇怕都係得個桔;就算佢哋冠軍賠率有成十七倍,好似幾好分,我求大俠都係勸大家咪買。
偶像轉大會好帶挈偶像轉大會好帶挈
朗尼轉投曼聯,愛華頓fans當然失望;有位球迷更喺前晚朗尼落實轉會後,第一時間將佢擁有嘅網址www.WayneRooneyOnline.com 放上網求售,好明顯呢位梗係愛華頓球迷啦。照睇朗尼前途更加光明,我求大俠亦知道佢重未有個人官方網,呢個網址留多陣吊高嚟賣都得喎!