【靚媽開箱文】許廷鏗送碟邀請睇騷 梁詠琪：剝牙可唔可以免費呀？

蘋果日報 2019/01/22 23:12

紅館牙醫梁詠琪許廷鏗剝牙再見智慧齒
  • empty
    GiGi今日喺IG貼片，講收到許廷鏗隻碟同張卡。（Instagram圖片）
  • empty
    佢都講得好詳細，仲猛話要支持許廷鏗。（Instagram圖片）
  • empty
    轉個頭，許廷鏗喺自己個IG限時動態度貼cap圖，仲反問「我係唔係發緊夢啊？」（Instagram圖片）
  • empty
    另一邊廂，何雁詩都有出po恭喜許廷鏗，仲話想喺紅館度剝牙。（Instagram圖片）
  • empty
    有份出席飯局嘅胡鴻鈞，都有出合照po，仲幫許廷鏗谷飛。（Instagram圖片）
    身兼牙醫嘅歌手許廷鏗，將於3月23日舉行首個個人紅館演唱會「再見智慧齒」，門票公售在即，呢排許廷鏗應該周身唔得閒，又要顧個騷、又要宣傳各樣，不過，忙還忙，有啲嘢都係要做嘅。
    近日許廷鏗開始「派帖」邀請啲老友嚟睇騷，其中早前被許廷鏗訪問過嘅靚媽梁詠琪（GiGi），今日就喺Instagram度貼咗條短片，係許廷鏗隻同名專輯嘅開箱文，除咗有許廷鏗親筆簽名同message外，仲附咗一張心意卡，話「感謝你成就我人生第一個紅館嘅里程碑」，許廷鏗仲約定GiGi「到時見」，GiGi即笑言：「到時見？咁即係要度期㗎喇喎！」
    GiGi多次喺片中話要支持呢位咁有心嘅大男孩，不過，更搞笑嘅係，GiGi喺片尾問：「真係要剝牙係咪去佢度剝呀？可唔可以免費呀？」可唔可以免費就未知，但肯定GiGi呢段段令到許廷鏗好開心，因為佢喺自己個IG限時動態度度GiGi個post嘅cap圖，仲問：「我係唔係發緊夢啊？」
    而想搵許廷鏗操刀剝牙嘅，其實仲有何雁詩，今晚佢喺IG貼出同許廷鏗及胡鴻鈞等人嘅合照，各人手上都有許廷鏗簽咗名嘅演唱會宣傳物，何雁詩留言話：「十年前我們認識對方，九年前我們踏上紅館，2019你再次踏上紅館，這次是你個人的演唱會！回想起當年我們傻瓜般，到今天你夢想成真，親愛的，真心為你高興！這一切得來不易，你是值得的！」精髓喺hashtag處，「#我都要再見智慧齒」、「#麻煩快d幫我mok（剝）牙」、「#我要紅館台上mok（剝）牙」。
    其實許廷鏗不如改做剝牙騷，可能都有得諗吓……
    精選娛聞，喺晒《娛果》
    http://fb.com/appledailyent