自由黨田北俊似乎同689好有緣，田少喺特首選舉期間嘅ABC（Anyone But CY）策略，預示呢個數字不祥，佢之後都代表咗市民猛力狙擊，甚至因為要求689考慮辭職而被阿爺搣柴。噚日馬場今季第689場賽事，咁啱由田少「人民武士」跑出，莫非預視田少vs689，一定sure win？
沙田馬場噚日頭場嘅新馬賽1,200米，由巫斯義策騎嘅「人民武士」跑第一，而呢隻「人民武士」就係「武士」系馬主、田北俊名下嘅新馬，呢匹摩廐嘅馬身價不菲，周歲價達100萬澳元（超過600萬港元），來港後第二場就「開齋」，證明貴得有道理。
匹新馬咁聽教聽話，田少都入咗馬場拉頭馬，佢話呢隻馬係練馬師大摩為佢買入，馬匹父母線血統都好優秀，吸引到佢扑槌。佢覺得「人民武士」在港第二仗已經打開勝利之門，表現唔錯。

田少拉頭馬前出席完港台節目，佢話現有政改方案下，就算自己要選特首，入到閘都未必能出閘，估唔到佢嘅新馬出完閘仲win埋。田少噚日知道呢場係今季賽事第689場賽事後都大叫really？仲話唔識拉頭馬嗰幾個人，只係一齊坐喺觀眾席一齊嗌，梗係要叫埋佢哋一齊拉頭馬，呢啲咪叫人民武士囉。

李八方
mailto:[email protected]