灣仔金紫荊廣場係內地旅客指定打卡旅遊點，上個禮拜三就發生咗一宗內地旅客同影相檔職員嘅打交案，20幾人打埋一齊，又飛腳又直拳，仲有人搶埋導遊支旗仔當武器。呢場MMA最終不分勝負，因為警察嚟到分別拉咗內地旅客同影相檔職員各3人。有導遊就話金紫荊廣場影相檔亂七八糟，係時候要整頓吓。

導遊旗仔當武器

拍片嘅阿明本身係導遊，上周三中午佢帶團去金紫荊廣場，將一車車嘅大叔大媽車去金紫荊雕塑前影相，當時喺廣場嘅10檔影相檔職員就走出嚟推銷攝影套餐，「8吋大相15元人民幣」，十分墟冚。
點知無耐就有影相檔職員同幾個內地旅客嘈交，講唔掂就打起上嚟，當時有20幾人圍埋一齊，大家拳來腳往，混亂中仲有人連鞋都甩埋，好鬼狼狽，連內地導遊嗰支旗仔都俾人搶埋當武器追住人嚟打，搞到呢個「神聖廣場」烏煙瘴氣。片段中最精采就係4、5個大叔大哥打埋身肉搏，其中一個着住黑白格仔衫嘅阿哥最衝動，一撲前就連出4拳，直拳、鈎拳，重拳，連環拳，有人中拳之後都退咗幾步，真係戥佢肉痛。因為趕住帶團，阿明之後上車走咗，唔知呢場金紫荊大戰最終誰勝誰負。
警方發言人話，上星期三中午12點44分喺金紫荊廣場發生一宗「公眾地方打交」案，分別拘捕3個內地男子同3名影相檔職員，事後其中兩個職員同一個內地遊客被落案，稍後將提堂審理。《蘋果》事後去番金紫荊廣場，發現嗰度有10個影相檔，但問番單打交事件，個個職員都異口同聲話「唔知，無聽過」。