「Package男神」劉鳴煒趁噚日係「白色情人節」，竟然要匿埋做毒男？話說男神噚日突然喺fb出po，留言「街裡愛人一對對，就算單身都唔洗氣餒」，佢話每逢情人節，fb都有大量情侶放閃，佢就同大家分享一個「特別嘅攝影技巧」，令大家即使單身都可以晒幸福，仲要hashtag「其實自己一個更開心」 、「情人節冇情人自拍」 等字，莫非呢個筍盤，宣佈重新上市？（應該唔係，除非係！）

劉鳴煒po出嘅大量相片，可見佢喺一間日本餐廳，為自己搽紅色指甲油，再以右手反手餵自己食壽司自拍。另一款就將茶壺茶杯層層叠，再放上手機自拍。
唔少網友睇到都笑咗，有人讚男神好叻，識自己搽指甲油，更有人話俾男神隻靚手呃到（因為真係似女士嘅纖纖玉手），仲問男神用開咩hand mask㖭喎！當然唔少人亦質疑，話男神冇可能單身，話佢明顯係「偽毒」囉。