今日重頭戲當然係荷蘭對阿根廷，但好睇唔代表好賭；同日同組另1場科特迪瓦對塞黑哀兵對撼，更見搵食機會。
由於全世界莊家同華度一樣，都睇過晒科特迪瓦及塞黑兩軍表現，大家都認為呢兩支已經出局嘅球隊，今仗純粹以實力分高下。講到好感，當然秤先科軍，由索高拿做軸心嗰條中場線，夠硬淨之餘又有技術，粗中有幼；比起淨係得個好技術，但狀態唔穩定嘅塞黑陣容，好似史坦高域呢位主將，上場輸畀阿根廷後俾德國報紙佬批評到體無完膚，呢場科軍要贏冇問題。

戰將搏表現搵好碼頭

事實上，呢場雖然係「例行公事」，但一班非洲兵都希望好似塞內加爾、尼日利亞等球隊咁，喺世界盃爭取表現，博有班主睇中，泊得個好碼頭，咁就唔使憂囉。
各地莊家亦已將呢場科特迪瓦單Ｗ，由原來嘅2.3至2.6倍調落到目前只有1.9至2.1倍不等。其中一個基地設喺德國首都柏林嘅Wetten.de博彩公司，亦有同樣舉動；佢哋亦有好似足智彩嘅「讓球主客和」玩法。呢場科特迪瓦「主勝」，有成4倍以上分頭，足智彩都係得3.7倍。華度已經醒咗幾位德國波友，記得押呢一注。文：華度
採訪隊推介
華度心水：科特迪瓦勝[-1]