建滔化工(148)老闆張國榮似乎真係好鍾意國泰航空(293)，佢上星期見國泰完成600人裁員行動，旋即再度入市增持國泰，建滔喺國泰最新嘅持股量已經去到8.06%，佢呢手貨市值39億元。

建滔首次披露持有國泰，係舊年12月，因為佢增持到超過5%，所以要向聯交所申報，到咗今年3月同5月，佢又掃咗兩輪，連埋上星期四(8日)，單係今年3次掃入國泰股票，已經用咗5.3億元；加埋佢之前動用22.6億元買5%，至今，建滔用咗接近28億元買國泰。

建滔嘅入市價亦一次高過一次，舊年底講緊平均價10.2元，上星期去到12.61元，真係要十分睇好國泰，先至會咁掃法。

按建滔年報，佢舊年底有現金64億元，上市公司有多餘錢，買股票投資收息無可厚非，之但係，建滔市值300億元，屬於二線股，大拿拿拎幾十億元買重一隻航空股，會唔會太過單一，張國榮又怕唔怕被小股東怪佢唔識分散投資呢?

再睇番國泰股權，大股東太古A(019)揸住45%，中國國航(753)揸住另外29.99%，加埋接近75%，國泰與國航互控，市場一般估計兩者關係好好，不過金融市場變幻莫測，太古係時候好好同張國榮摸個底，唱番句:「如你共我心不相同，一生愛情都白送」。

掌握財經生活資訊，即Like「蘋果ATM」fb專頁啦！
http://fb.com/appledailyatm