北京對港落實全面治權，亦要求港人了解《基本法》同《憲法》，所以特區政府都話明要加強推廣《基本法》——當然係推廣港共政權想大家關注嘅《基本法》內容原則，例如《基本法》確立咗「一國」係實行「兩制」嘅根本等，唔通推廣大家最關注同需要嘅人權、自由、民主等承諾保障咩？

要推廣「政治正確」嘅《基本法》，當然要搵自己友先至有信心保證啦！政府今日公佈委任2名《基本法》推廣督導委員會（基廣會）新成員，分別係律師會會長彭韻僖，同埋前油尖旺區議員主席、民建聯葉傲冬。

彭韻僖治下嘅律師會，同特區政府有幾咁啱key，毋須八方多講啦；近日法律界群起斥官媒攻擊批准黎智英保釋嘅李運騰法官，促律政司鄭若驊咪鵪鶉時，彭韻僖都未開腔喎！

至於葉傲冬，根正苗紅，去年區選輸咗畀陳梓維，仲有黨照住，可以重返《文匯報》做高層，有左報做平台，要協助宣傳港共想大家認知嘅《基本法》，點會有難度？

政府同時公佈，區佩兒、洪雯博士同胡健民再度獲任兩年；李浩然則再獲委任一年。身兼基廣會主席嘅張建宗感謝即將離任嘅資深大律師莫樹聯、港區人大代表黃友嘉、張俊勇同石嘉麗。

政府話，基廣會係負責為推廣《基本法》嘅計劃同策略提供意見，並作為組織《基本法》推廣工作嘅中心點，以協調政府部門同社會各有關方面所進行嘅推廣工作；2位新加盟「紅人」，肯定不負使命。

-----------------------------

《蘋果》英文版免費試睇：了解更多

英文版已登錄《蘋果》App，立即下載/ 更新：iOS / Android

-----------------------------

支持蘋果深度報道，深入社區，踢爆權貴，即Like蘋果專題及調查組FB專頁！